સમય ચાલ્યો જાય પૂરપાટ સડસડાટ
તોય હું ત્યાંની ત્યાંજ...અટકેલી
મારી અનુભુતિ સાથે...
કરે છે હાથ પરની કરચલીઓ બબડાટ
તોય હું ત્યાંની ત્યાંજ...ચૂપચાપ
મારી અનુભુતી સાથે
થઈ રહ્યું છે ઘમાસાણ હૃદય મહી ભયંકર
તોય હું ત્યાંની ત્યાંજ...અચેતન
મારી અનુભુતી સાથે
ફર્યા કરુ છું ઘડિયાળના કાંટા જ્યમ નિરંતર
તોય હું ત્યાંની ત્યાંજ...પહોંચેલી
મારી અનુભૂતિની સાથે
ઘણું જીવી જગનાં ઇશારે સરેઆમ સંસારમાં
તોય હું ત્યાંની ત્યાંજ...એકલી
મારી અનુભુતિ સાથે
