હકીકતમાં તમે મારી કદી કિંમત નહીં સમજી,
ખુમારી, ખાનદાનીને ખરી દોલત નહીં સમજી.
કહ્યું તું, રાખજો અંતર તમે એનાથી ભારોભાર,
તમે કાયમ કરી અવગણના, મારો મત નહીં સમજી.
હશે છોડો, જવાદો વાતને એવું કહી દીધું,
અમારી ભૂલ, આફતને અમે આફત નહીં સમજી.
અલગ થાવું હતું તારે, મને એનો નથી વાંધો,
મને અફસોસ રે`શે કાયમી, ચાહત નહીં સમજી.
સમય વીતી ગયો ત્યારે તને આ ભાન આવ્યું યાર?
સમજવાની હતી ત્યારે તેં એ બાબત નહીં સમજી.
...પ્રશાંત સોમાણી
