નવા વર્ષના આપણે સૌ એકબીજાને ગળે મળી રહયા છીએ.
અહીં વિક્રમ સંવત ૨૦૭૮નો પ્રારંભ થઈ રહ્યો છે ત્યારે મને ખબર નથી પડતી કે વિદાય વર્ષને હું કઈ જગ્યાએ સંઘરી રાખું ? બંધ મુઠ્ઠીમાં, હદયમાં કે મારી આંખોમાં.
વિદાય વર્ષે ઘણા પરિચિતો અને જાણીતા લોકો મારાથી રિસાયા ખોવાયા કે અજાણતા પોતાની જાતે ખરી પડ્યા.
મારા સંબંધોના સરવાળા બાદબાકી કરતા તેનુ સરવૈયું હાલક ડોલક થતાં કોઈ મેળ પડતો નથી. રકમ કઈ બાજુની બાકી રહી ગઈ, કોઈ હિસાબ લખવાનો રહી ગયો છે કે કેટલો કરવાનો બાકી રહી ગયો તે મને સમજાતું નથી. કેટલાક એવા સંબંધો છે તેના તાણાવાણા એટલા બધા લાંબા થયા છે કે જેનો છેડાને હું આંબી શકુ તેમ નથી.
કોઈ પુછે તો મારે જીવન-સંબંધોનું સરવૈયું ઓકે છે તેમ કહી વાતને સમેટી લેવી પડે છે.
આખા વર્ષની મહેનત કર્યા પછી પણ કોઈ પુરેપુરી ધનસંપતિ મિલકત કે સંબંધોની પ્રાપ્તિ મારી થઇ શકી નથી.
મારા કે બીજા લોકોના શરીરમાં લોહીમાં કોઇ તફાવત ન હોવા છતાં તેમજ મારા માનસપટલમાં લોકોની સંખ્યા દરિયાની ભરતીના મોજાની જેમ આગળ વધી હોવા છતાં મારી બધી ઈચ્છાઓ અપેક્ષાઓ પરિપુર્ણ થઈ નથી. ક્યારેક સંબંધો વસંતની જેમ ખીલ્યા છે તો ક્યારેક સંબંધોમાં પાનખર આવી.
નવા ૨૦૭૮ની સાલમાં આપ સૌના સહિયારા સહકારથી નવી આશાઓ અપેક્ષાઓ કે સ્વપ્નાઓના નવા બીજ વાવી પ્રેમના પુષ્પો વડે પાણીનું સિંચન કરી વટવૃક્ષ બનાવવું છે.
મારે કોઈ એવો જાદુઈ ચિરાગ કે પારસમણી નથી જોઈતો કે મને તાત્કાલિક નવા સંબંધો નાળીયેરના ઝાડની જેમ ઉંચાઈ માપે.
મારે તો નવા સંબંધોની નવી વ્યાખ્યા ઉભી કરવી છે તે માટે મારી પાસે ઘણા બધા રસ્તાઓ છે જ પરંતુ તે માટે હું રાહ જોઉં, સ્વીકારી લઉં કે પરીક્ષા આપી પાસ થાવ કે નાપાસ મને કોઈ ડર નથી.
કોઈની પાસે એવી જડીબુટ્ટી નથી કે સંબંધોને અમર બનાવવા મને અમૃત પાઈ શકે. મારે તો માત્ર તેમાંથી મારી સાથે નિરાંતે બેસી બે ઘડી વાતો કરી શકે તેવા બે પાંચ લોકો જોઈએ છીએ નહીં કે માણસોનું ટોળું.
મારે તો જીંદગીભરનો થોડો થાક ઉતારે તેવો મારો હાથ હામી શકે તેવા સાચા માણસની શોધમાં ભટકી રહ્યો છું અને તમે પણ આ જ વિચારતા હશો.
હું ઈશ્વરને પ્રાર્થના એ જ કરૂં કે આ નવા વર્ષમાં આપણને સૌને આવી આકાંક્ષાઓ ઈચ્છાઓ અને શમણાંઓ પુરા થાય તેવી આશા સાથે.
નુતન વર્ષની સૌને મારી તરફથી અંતઃકરણથી શુભેચ્છા.
