ગઝલ
ઘટના ચમનમાં જે બની ચોંકાવનારી તો નથી ને ?
ફૂલો સમીપે ગંધની કોમળ કટારી તો નથી ને ?
ક્યારેક એની આંખમાં સ્ફોટક પદાર્થો હોય છે,
જલ્દી ચકાસો આ હવા લૂચ્ચી, ઠગારી તો નથી ને ?
બોજો સતત ખડકયા કરો છો એટલે જોવું પડે કે-
માની રહ્યા છો જિંદગી એ હાથલારી તો નથી ને ?
ચેકીંગ કરવું એ પડે કે આવનારી આ પનોતી,
અઢળક મુસીબત ને સમસ્યા લાવનારી તો નથી ને ?
જોવું જ પડશે જાતમાં થોડું કરીને ડોકિયું કે-
અફસોસની સાથે નિરાશાઓ પધારી તો નથી ને ?
જિજ્ઞા ત્રિવેદી
