"વિનાયક વંદના"
આવ્યા ચતુર્થીના રૂડા અવસર, પધાર્યા દેવ આજ,
ભાવે નમન કરીએ ચરણે, સુધારો અમારા કાજ.
પ્રથમ નમું હું સુમુખ સુંદર, ભાવે નમું એકદંત,
વાંકી સૂંઢે અમૃત વરસાવો, વક્રતુંડ ભગવંત.
કમળ નયને દિવ્ય તેજ ઝળકે, કૃષ્ણપિંગાક્ષ કહાવ્યા,
વિશાળ મસ્તકે જ્ઞાન દીપાવે, જગમાં ગજવક્ત પૂજાયા.
મોદક પ્રેમે સદાય આરોગે, ઉદર વિશાળ લંબોદર,
સંકટ સમયે રક્ષણ કરતા, દિવ્ય પ્રતાપી વિકટ હર.
કષ્ટ નિવારી મંગલ કરતા, જય હો વિઘ્નવિનાશક,
અગ્નિ-ધૂમ્ર સમ આભા જેની, નમું ધૂમ્રવર્ણ પાલક.
મસ્તક શીતળ શશી બિરાજે, શોભે ભાલચંદ્ર રૂડા,
સર્વ દેવોમાં અગ્રેસર પૂજાતા, વિનાયક ગુણવંતા પૂરા.
ગણો તણા જે અધિપતિ સ્વામી, વ્હાલા ગણપતિ રાય,
દુઃખ હરીને હર્ષ વરસાવે, સહુ ગજાનન ગુણ ગાય.
રિદ્ધિ-સિદ્ધિ સંગે બિરાજો, દીન જનોના તારણહાર,
આજ ગણેશ ચતુર્થીએ ગૂંજે, મંગલમૂર્તિ "સ્વયમ્'ભૂ" જયજયકાર!
અશ્વિન રાઠોડ — "સ્વયમ્'ભૂ"
