પ્રભુ 🙏🏻...
હશે એ દ્રષ્ટિભ્રમ, પણ છળ તો નથી જ
માંગીએ એ ભેગા પામી પણ લઈએ
એટલું એ સરળ તો નથી જ
હા,હતાં મૌન અધર,
પણ ન જોયા એ જોડેલા કર?
ન જોયું એ નમેલું શીશ?
ને ન જોઈ એ મૂંગી રીસ?
ખરા છો તમેય પ્રભુ!
માત્ર શબ્દો થી જ વ્યક્ત થાય
એટલું એ અકળ તો નથી જ.
કોઈ ના સંપૂર્ણ સમર્પણ ને કેમ કરી વર્ણવશો?
હે સર્વશક્તિમાન!
આપને આ સર્વોચ્ચ સ્થાન માટે ગર્વ છે
કે અભિમાન એ સમજાવશો?
નતમસ્તકે પાંપણોથી હમણાં
કોઈ તમારા ચરણ પખાળી ગયું,
પ્રભુ જરાં ધ્યાન થી જુઓ,
ગમે તે હોય પણ એ માત્ર જળ તો નથી જ.
નર્યા ઝંઝાવાત વચ્ચેય અડીખમ છું
હાલક-ડોલક નાવમાંય સક્ષમ છું
બસ કરો હવે કરુણાકર;
આ મધદરિયે ઉઠતો વલોપાતનું કારણ માત્ર
વમળ તો નથી જ.
એ આસ્થા છે, શ્રદ્ધા છે, પ્રાર્થના છે
એ વિનંતી સાર્થક કરવાની અભ્યર્થના છે
પ્રભુ!આપના ચરણો માં ચડાવવામાં આવતા પુષ્પો એ
માત્ર ફૂલ, ગલગોટા કે કમળ તો નથી જ....
