પર્વતની ટોચેથી જોયું
સરવરની પાળેથી જોયું
વનરાવનની કુંજ ગલીમાં
કદંબની ડાળેથી જોયું
રમત મજાની છાની છપની ક્યાં સંતાણો કાનુડા ....
તુજને ગોતી મારે કરવો .....
કાનુડા નો થપ્પો ......
નરસિંહના કેદારે જોયું
મીરાના મેવાડે જોયું
વનરાવનની ગોકુળીયામાં
રાધાના દલડે જઈ જોયું
આંખોમાં અમરતની ધારા ક્યાં સંતાણો કાનુડા .....
એને નીરખી કરવો મારે
કાનુડાનો થપ્પો .....
આકળ- વીકળ આંખડીયું છે
માખણ - મિસરી વાતડીયું છે
સૂની સૂની રાતડીયું છે
ડાળે સૂકી પાંદડીયું છે
હૈયાના ધીમા ધબકારા ક્યાં સંતાયો કાનુડા ....
હાથ તારો ઝાલી મારે કરવો
કાનુડાનો થપ્પો .....
------ હર્ષિદા દીપક
