હું પ્રણયમાં છું, મદિરા વિશે શું કહું !
બોલ સાકી ! લથડવા વિશે શું કહું !
યોગ, માળા ને ભગવા વિશે શું કહું !
કે સહજતા, સરળતા વિશે શું કહું !
આમ કાયમ તડપવા વિશે શું કહું !
રૂઝ ઝંખે, ઉઝરડા વિશે શું કહું !
આજીવન હું રખડવા વિશે શું કહું !
થાક, રસ્તો ને પગલાં વિશે શું કહું !
માપ કાંડાનું એનું મને યાદ છે,
બંગડીઓ મૂલવવા વિશે શું કહું !
ઉત્સવો જેમ માહોલ તો જામતો,
ફોન આવે ને મળવા વિશે શું કહું !
એક ઈચ્છા ફળી ના, રહી વાંઝણી,
કે અધૂરા અભરખા વિશે શું કહું !
પાનખર આવતાં બાગ ચિંતા કરે,
આ હવાની જ અફવા વિશે શું કહું !
જીવ જોખમમાં મૂકી અનુભવ કર્યો,
પ્રેમ તારા અખતરા વિશે શું કહું !
બાળના હાથ છાલાં ભરેલા મળ્યા,
ઝૂરતા આ રમકડાં વિશે શું કહું !
માવઠું આવતાં જે તણાઈ ગયું,
એક ખેડૂના સપના વિશે શું કહું !
હું ઉધામા કરી થાક હંફાવતો,
શ્વાસ સાથે ઝઘડવા વિશે શું કહું !
આજ પણ એ ગલીમાં કદમ થોભતા,
ત્યાં કદમના અટકવા વિશે શું કહું !
કૈક દિવસો ગુજાર્યા સતત જોઈને,
એ ગલી, બારી, પડદા વિશે શું કહું !
રૂપ એનું ગઝલ જેવું લાગે મને,
હૂબહૂ નાક નકશા વિશે શું કહું !
તુંય વાંચીને આવી હતી આંખ જે,
આંખ તારી સફળતા વિશે શું કહું !
એની ઉડતી ખબર આવવાની મળી,
ને હૃદયના ઉમળકા વિશે શું કહું !
મેં ઉદાસીનું ખાતર કર્યું એ પછી,
આ ગઝલના ઉછરવા વિશે શું કહું !
સાંત્વના આપવા આવ્યું ના કોઇપણ,
ખાલીપો ખૂબ કળવા વિશે શું કહું !
એક જૂની વ્યથાથી પરેશાન છું,
વેદનાની બળતરા વિશે શું કહું !
મહેંક સઘળી થઈ વાસ તો દૂર થ્યાં,
માવતર ઝૂરી મરવા વિશે શું કહું !
હોય આખી કથા એક પળમાં સદા,
ક્ષણમાં યુગના સરકવા વિશે શું કહું !
ભાર ન્હોતો નનામીનો, સાથમાં,
કૈક અરમાન મરવા વિશે શું કહું !
મન થયું શાંત ત્યારે સમાધિ ફળી,
છેક ભીતર ઉતરવા વિશે શું કહું !
દોસ્ત સાથે ચા પીવાના જલસા 'કમલ',
મોજ, મસ્તી, સબડકા વિશે શું કહું !
આમ તો હુંય પાલનપુરી છું 'કમલ',
વારસામાં ગઝલતા વિશે શું કહું !
ક્યાં 'કમલ' છાતી કૂટે નિવારણ મળે !
પ્રશ્ન એવા સળગતા વિશે શું કહું !
*કમલ પાલનપુરી*
