*તો બહુ સરસ*
ગઝલ
એકાદ શમણું આંખમાં વાવી શકો તો બહુ સરસ,
સૂકા હૃદયમાં પ્રીત ફણગાવી શકો તો બહુ સરસ.
ભીનાં નયનમાં છે કસક જુદાઇની એ જોઈ લો,
તો અશ્રુને પણ આપ સમજાવી શકો તો બહુ સરસ.
હા, કાચની માફક અમારું દિલ ઘણું નાજુક રહ્યું,
તો તૂટતાં દિલનેય અટકાવી શકો તો બહુ સરસ.
આ દ્વાર મનનાં રાખ્યા છે ખુલ્લાં, ખબર રાખો હવે,
સંજોગ ને આ યુગ જો પલટાવી શકો તો બહુ સરસ.
માહોલ છે વરસાદનો ને તન ઘણાં ભીંજાય છે,
ભીતરથી અંતરમનને ભીંજાવી શકો તો બહુ સરસ.
બેચેન દિલને ક્યાંય પણ શાતા વળે નહિ, સત્ય છે,
તો એ તૃષાને ક્યાંક મિટાવી શકો તો બહુ સરસ.
કાગળ કલમ પર 'નેહ'ની દાસ્તાન પણ સજતી રહી,
દાસ્તાનને સુણવા તમે આવી શકો તો બહુ સરસ.
– *વંદના બ્રહ્મભટ્ટ "નેહ"*
10/11/'20
