એટલી જ ઇચ્છા છે અંતરની કે મને માનવમા માધવ દેખાય.
એટલી જ ઇચ્છા છે અંતરની કે મને રંકજનમાં રાઘવ દેખાય.
ન રહે ભેદભાવ નાતજાત કે રંક તવંગરના કદી મુજ માનસે,
એટલી જ ઇચ્છા છે અંતરની કે પ્રત્યેકમાં પ્રેમ આસવ દેખાય.
સૃષ્ટિ નિખાલસને ભોળી શિશુની નીરખીને મુજ હૈયું હસે,
એટલી જ ઇચ્છા છે કે અંતરની કે મને ભૂલકાંમાં કેશવ દેખાય.
માનવ માનવ વચ્ચે બંધાય જાય સ્નેહસેતુ સદાકાળ સહજ,
એટલી જ ઇચ્છા છે અંતરની કે માનવમાત્રમાં બાંધવ દેખાય.
ના રહે રાગદ્વેષ કે કિન્નાખોરી ક્યારેય કદી મુજ ઉરમાં વળી,
એટલી જ ઇચ્છા છે અંતરની કે પ્રભુ મને આજ ભવ દેખાય.
ચૈતન્ય જોષી પોરબંદર. ' દીપક '
