આમ્રકુજે કોકિલનો ટહૂકાર થતાં પગલાં વસંતના.
હરિયાળી ખીલી પૂરબહાર થતાં પગલાં વસંતના.
ધર્યાં રુપ નવલાં બાગબગીચેને વનરાઈ ઉપવને,
જાણે સજ્યા નૂતન સિંગાર થતાં પગલાં વસંતના.
પ્રકૃતિએ ધારણ કીધા સોળ શણગાર મન મૂકીને,
પુષ્પ સમીપ ભ્રમરના ગુંજાર થતાં પગલાં વસંતના.
રંગ વૈવિધ્યે લત્તા દ્રુમને આલિંગે કરીને પ્રેમપ્રસાર,
રખેને નિસર્ગ મનાવે તહેવાર થતા પગલાં વસંતના.
મયૂર કરે નૃત્ય મનોહર નયને અશ્રુબિંદુ સારતો જે,
શકે સર્વત્ર મદનનો અધિકાર થતાં પગલાં વસંતના.
રંગાય તન મન બદન જોમ જમાવતું જાય યૌવન,
હશે ૠતુરાજ અનંગ પ્રહાર થતાં પગલાં વસંતના.
ચૈતન્ય જોષી. ' દીપક ' પોરબંદર.
