સ્હેજ આગળ આવતા શીખી ગયા;
જાતને પડકારતા શીખી ગયા.
ઉત્તરો છે હાથમાં ક્યાં એમના?
પ્રશ્નને સમજાવતા શીખી ગયા.
ના કરી શક્યા કદી જે તૃપ્ત એ;
સર્વને તલસાવતા શીખી ગયા.
ડૂબવાનો ડર લઈ નીકળ્યા હતા;
એ હલેસા મારતા શીખી ગયા.
વાત જેને આવડી, ના આવડી,
વાતને વણસાવતા શીખી ગયા.
ભલભલા પુરુષાર્થવાદીઓ અહીં;
ભાગ્યને અજમાવતા શીખી ગયા.
કેટલી ઠંડી હશે જો ભીતરે?
તાપણું સળગાવતા શીખી ગયા.
ના ભલે બદલી શક્યા એ દ્રશ્યને ;
દ્રશ્યને દર્શાવતા શીખી ગયા.
ડૉ. મુકેશ જોષી
