મેં આંખોમાં અચરજ જોયું,
ના થોડું , પણ અનહદ જોયું !
બાળક કાયમ ચંચળ જોયું,
હસતું રમતું શૈશવ જોયું !
ન વગોવો ટોળાને કાયમ ,
મેં મદદ કરવા તત્પર જોયું !
વીતી ગઈ આખી ઉંમર જ્યાં,
ઘર સાવ એ જર્જર જોયું !
શરમાતાં આમ રહ્યાં એ તો ,
ને આજે તો બેધડક જોયું !
સારા શિક્ષકના હાથે તો ,
વિદ્યાર્થીનું ઘડતર જોયું !
ચાલે છે જે ગુનાના પંથે ,
જીવન એનું બદતર જોયું !
ચહેરો મારો જોવો જો હતો,
એ આંખોમાં દર્પણ જોયું !
- હેમંત મદ્રાસી
