મેં ડૂબકી મારી દીધી મનના તળાવમાં,
મોટો ફરક લાગ્યો મને મારા સ્વભાવમાં.
તારી દલીલો માન્ય રાખી લીધી છે જગે,
મારે શું કહેવાનું હવે મારા બચાવમાં!!
ઘરડાઘરે રહીનેય ચિંતા દીકરા ની છે,
સ્હેજે ફરક પડતો નથી 'મા'ના લગાવમાં.
આદત નથી પડવા દીધી મેં કોઈ ચીજની,
હું જીવતા શીખી ગયો તારા અભાવમાં.
તું તારી પાસે રાખજે તારી મહાનતા,
આવ્યો નથી હું કોઈ ના ખોટા પ્રભાવમાં.
લ્હેરોની માફક મુક્ત મન રાખી જીવી ગયો,
"સાગર"નથી આવ્યો કદી કોઈ તણાવમાં.
રાકેશ સગર, સાગર, વડોદરા ...
