સિગ્નલ
સવાર સવારમાં નિશાંતે એના પપ્પા પાસે કોલેજ માટે 'પોકેટમની' માટે ૨૦૦૦/- રૂ.માગ્યા.પણ પપ્પા એ એટલા બધાં રૂપિયા આપવાની ચોખ્ખી ના પાડી દીધી.એણે મમ્મી સામે જોયું પણ એ પપ્પાથી ડરેલી,કંઈ જ ના બોલી શકી. ગુસ્સામાં ચા-નાસ્તો કર્યા વગર જ એ ઘરની બહાર નીકળી ગયો.
આખા રસ્તે મનમાં મા- બાપ ને કોસતો રહયો કે,આવા મા- બાપ હોય એના કરતાં અનાથ રહેવું સારું...
ત્યાં જ ચાર રસ્તે સિગ્નલ પર બાઈક ઉભું રાખ્યું ને એની પાસે એક નાનો ગરીબ ચિંથરેહાલ છોકરો હાથ ફેલાવીને ભીખ માંગવા ઉભો રહ્યો,ને બોલ્યો ,"આ, અનાથને કંઈ આપો,સવારથી કંઈ ખાધું નથી"...!!.નિશાંતે ખિસ્સામાં થી ૧૦ રૂ.કાઢીને પેલા છોકરાને આપ્યા..ને તરત જ પેલો ગરીબ છોકરાએ સામે બદલામાં કહ્યું કે, મોટાભાઈ, ભગવાન કાયમ તમારા મા-બાપ ને સહીસલામત રાખે ને તમારા જેવો દિકરો સૌને આપે.....
ને... નિશાંતે તરત જ ઘર તરફ U-Turn લઈ લીધો..!!
