"પ્રીતના ઘેલાં"
અમે તો પ્રીતનાં ઘેલા, અમારા મીન સરોવરના નાતા;
મીન સરોવરના નાતા, અમ થી મૂક્યા નથી મૂકાતા-
અમે તો.....
સરોવર સુકાતાં હંસ ઉડીને, થીર બીજે થઈ જાતા;
વિણું પાંખુંનાં વિહંગડાં અમે, જળ સાથે ઝડપાતા.
અમે તો.....
ઘણ ને ઘાએ અગન ની ફૂંકે, ગાળ્યા એમ ગળાતાં;
ખાખ થિયા વિણ આઘા ન ખસતાં, લોઢા લાકડે જડાતાં.
અમે તો.....
માનવ માટીના જુગજુગ જૂનાં, સબંધ નિભાવ્યે જાતા;
માંડવે ચોરીના માટ મસાણે, આગ લઇ આગળ જાતા.
અમે તો.....
એવી લગન છે કલમ અણીથી, અળગાં થઇ સુકાતાં,
લહિયા આ સહ્યું લીલી ન જાણજે, ખૂટી ધૂળ્ય ખાતાં.
અમે તો.....
કાદવ સરખાં 'દાદ' કે કલેવર ને નીર સાથે નાતાં;
વેઠવા વસમાં વિયોગ એનાં, હૈયાં ચિરાઇ જાતાં.
અમે તો......
:- રચનાં કવિ શ્રી દાદ
