प्रकरण ४: जयंत देशपांडे आणि सत्याचा तुकडा
धुळ्यातील एका जुन्या कॅफेमध्ये चेतन आपल्या पुढच्या साक्षीदाराची वाट पाहत बसला होता. समोर गरम चहा ठेवल्यावरही त्याचा त्याकडे लक्ष नव्हतं. त्याच्या मनात फक्त एकच गोष्ट चालू होती— जयंत देशपांडे कोणत्या महत्त्वाच्या गोष्टी सांगू शकेल ?
इरफानने दिलेल्या माहितीनुसार , जयंत हा श्यामचा एकेकाळचा सहकारी होता. पण काही वर्षांपूर्वी त्याने अचानक त्याच्याशी संबंध तोडले. यामागे काहीतरी रहस्य होतं , आणि तेच चेतनला शोधायचं होतं.
तेवढ्यात कॅफेच्या दारातून एक मध्यम वयाचा माणूस आत शिरला . त्याच्या चेहऱ्यावर तणाव स्पष्ट दिसत होता. त्याने आजूबाजूला एकदा पाहिलं आणि नंतर थेट चेतनजवळ येऊन बसला.
" तू चेतन आहेस ? " जयंत देशपांडेने थोड्या घाबरलेल्या आवाजात विचारलं.
" हो . आणि तुला माहितीये का , तू श्यामबद्दल काही सांगणार आहेस म्हणूनच आता तुझा जीव धोक्यात आहे , " चेतन थेट मुद्द्यावर आला.
जयंतने एक दीर्घ श्वास घेतला. " मी फार काही सांगू शकत नाही ... पण मला जे माहीत आहे ते तुला कळायला हवं . श्याम हा फक्त एक व्यापारी नाही. तो एक सावलीसारखा माणूस आहे. तो समोर दिसत नाही , पण संपूर्ण धुळ्याच्या अंडरवर्ल्डवर त्याचा ताबा आहे . "
" गणपत चौधरी त्याच्याशी कशामुळे जोडले गेले होते ? "
जयंत थोडा वेळ गप्प राहिला , मग म्हणाला, " पैसे आणि सत्ता. गणपत चौधरींना मोठा धंदा करायचा होता , आणि श्यामकडे ते साधण्याचे मार्ग होते. पण गणपत चौधरी काही काळानंतर त्याच्या चक्रव्यूहात अडकले. ते बाहेर पडायचा प्रयत्न करत होते , आणि म्हणूनच ते मारले गेले ! "
चेतनला आता चित्र थोडंसं स्पष्ट होत होतं. " म्हणजे श्यामने त्यांचा खून करवला ? "
" मी असं ठामपणे सांगू शकत नाही, पण एक गोष्ट नक्की — त्यांनी मारण्याआधी गणपत चौधरींना काहीतरी मोठं सापडलं होतं. काहीतरी असं जे श्यामला संपवू शकत होतं . "
" काय ? "
जयंत थोडा पुढे सरसावला आणि हळू आवाजात म्हणाला , " एक फाईल. गणपत चौधरींनी काही कागदपत्रं जमा केली होती , जी श्यामच्या काळ्या धंद्याचं सत्य उघड करू शकली असती . आणि म्हणूनच ते खलास झाले."
" ही फाईल आता कुठे आहे ? " चेतनने ताडकन विचारलं.
" माझ्याकडे नाही ... पण चौधरींनी ती कोणाला तरी दिली असावी . "
. धोक्याची चाहूल
चेतनला हे समजून घ्यायला वेळ लागला नाही की ही फाईल हाच पुढचा मोठा धागा असणार. जर त्याला ती मिळाली, तर श्यामचं संपूर्ण साम्राज्य उध्वस्त होऊ शकतं.
" ही माहिती फार उपयोगी आहे, जयंत. आता मला ही फाईल कोणाकडे आहे ते शोधायचं आहे. "
जयंत काहीतरी बोलणार इतक्यात ... धाड !
कॅफेच्या काचेला एक मोठा आवाज झाला आणि एक दगड आत फेकला गेला. त्याच्यावर एक चिठ्ठी गुंडाळलेली होती .
चेतनने ती चिठ्ठी उघडली .
" चेतन , तुझा खेळ आता संपला. तू खूप पुढे जातोयस. थांब , नाहीतर पुढचा नंबर तुझा असेल ! "
जयंतच्या चेहऱ्यावर भीती स्पष्ट दिसू लागली. "श्यामला आपला संवाद कळला आहे ! "
चेतनने त्या दगडाकडे पाहिलं आणि मग शांतपणे हसला. " म्हणजे आपण योग्य मार्गावर आहोत ! "
क्रमशः ...
( पुढच्या भागात : चेतनला फाईलचा एक महत्त्वाचा धागा मिळतो , पण त्याच वेळी श्यामचा माणूस त्याच्या मागे लागतो! )
