જગત આખું સમાઈ ગયું હરિવર તારા નામમાં.
ના કશુંએ પછી બાકી રહ્યું હરિવર તારા નામમાં.
એકમાં અનેક છે સર્વસ્વ સાંપડતું સ્મરણ કરતાં,
જગ મને સાવ જુદું લાગ્યું હરિવર તારા નામમાં.
હરપળ, હરઘડી સાથ નિભાવે નામ તારું છે નામી,
ઉરને કૈંક અધિક જ ભાસ્યું હરિવર તારા નામમાં.
હેલી હેતની હૈયેથી ઉમટી શ્વાસસરગમે એ વણાયું,
જીહ્વાને પણ સહજ જણાયું હરિવર તારા નામમાં.
ના ફિકર મારે અંશીની હોય હાથવગું નામ હો મારે,
ના છૂટે કોઈ કાળે એવું ગણાયું હરિવર તારા નામમાં.
- ચૈતન્ય જોષી. ' દીપક ' પોરબંદર.
