કેટકેટલા મિત્રો મળ્યા આ જિંદગીની સફરમાં.
કેટલાક સાથે ભળ્યા આ જિંદગીની સફરમાં.
ના સમજાઈ હજુ લગી જિંદગી છે ગતિ તારી,
કેટલાક તો બાખડ્યા આ જિંદગીની સફરમાં.
ક્યારેક ફૂલગુલાબી તો ક્યારેક અગનની જ્વાળા,
કેટલાક અધરસ્તે ખડ્યા આ જિંદગીની સફરમાં.
કાંટાળી સેજ પર શયન કરી ગુલાબી કલ્પનામાં,
કેટલાક બીબાંઢાળે ઢળ્યા આ જિંદગીની સફરમાં.
કોઈ રહ્યા અડીખમ જીવનના સિદ્ધાંતો સાચવીને,
કોઈ ચીલો ચાતરીને વળ્યા આ જિંદગીની સફરમાં.
જીવનસાથીએ પણ ના નિભાવ્યો સાથ છેક લગી,
અડધે આયુષ એ નીકળ્યા આ જિંદગીની સફરમાં.
- ચૈતન્ય જોષી. ' દીપક ' પોરબંદર.
