શીખવું જો હોય, નીકળો શૂન્યતાની સહેજ આગળ;
જીતવું જો હોય, નીકળો શૂન્યતાની સહેજ આગળ.
સહેજ પણ ચિંતા કરીને આમ કરમાયા વિના અહીં;
ખીલવું જો હોય, નીકળો શૂન્યતાની સહેજ આગળ.
જિંદગીમાં શું ગમે છે? શું ખરે ગમવા સમુ છે?
વીણવું જો હોય, નીકળો શૂન્યતાની સહેજ આગળ.
પુણ્યને પણ એક સારું કામ આખી પૃથ્વી પર;
ચીંધવું જો હોય, નીકળો શૂન્યતાની સહેજ આગળ.
આ સમયની જેમ કાયમ એક બે યુગો બનીને;
વિતવું જો હોય, નીકળો શૂન્યતાની સહેજ આગળ.
આ તમસ ઘનઘોરને બસ સહેજ પોતાના જ તેજે;
ચિરવું જો હોય, નીકળો શૂન્યતાની સહેજ આગળ.
એ પરમના તેજને બસ એક કેવળ આયનો થઈ;
ઝીલવું જો હોય, નીકળો શૂન્યતાની સહેજ આગળ.
#ડૉ_મુકેશ_જોષી
