છેલ્લે હરી ફરીને ખુદનો જ સંગ ફાવે
રંગોની વાત હો તો પાણીનો રંગ ફાવે.
રોકેટ કે વિમાનો આંબી શકે ગગન, પણ...
ઘર એનું છે નજીકમાં, એથી પતંગ ફાવે.
અટકો છો વાત કરતાં એ તો ચલાવી લઉં છું
ચુંબન કદી થશે તો એમાં ના ભંગ ફાવે.
ટુકડે મળે જો સુખ તો જીવનમાં રસ ટકી રહે
બાબત અલગ છે દુખની, દુખ તો સળંગ ફાવે.
આખું જિવન લડીને તાલીમ એ મળી કે
હાર્યા પછી શરૂ હો એવીય જંગ ફાવે.
સૂવું જ છે ને મારે! હો કબ્ર કે ચિતા હો
એનો રિયાઝ કરવા હમણાં પલંગ ફાવે.
જોવા ગયાં સિનેમા, એમાં બબાલ થઇ ગઇ
જોવા ચહે એ 'બરફી', અમને 'દબંગ' ફાવે.
- પ્રજ્ઞેશ નાથાવત 'પગુ'