The Download Link has been successfully sent to your Mobile Number. Please Download the App.
Continue log in with
By clicking Log In, you agree to Matrubharti "Terms of Use" and "Privacy Policy"
Verification
Download App
Get a link to download app
વરસવું છે મારે...!! વાદલડી વરસે કે ન વરસે કુદરતની કરામતમાં વરસવું છે મારે... તારા પ્રેમના વરસાદમાં ભીંજાઈને તારી રાધા બનવું છે મારે... મોરલીયાને પણ કહી દો આજે મન મૂકીને નાચીલે આજે... વીજળીના ચમકારે ચમકારે થનગનવુ છે આજે મારે... સરોવરના સથવારે સથવારે હૈયાની હેલ રેલાવી છે આજે... માવઠાની આ મોસમમાં તારી કિનારી બનવું છે મારે... વાદલડી વરસે કે ન વરસે કુદરતની કરામતમાં વરસવું છે મારે...
આજે ઈશ્વરની આંખમાં જાણે કંઈ ખૂચ્યુ..! "આજે ઈશ્વરની આંખમાં જાણે કંઈ ખૂચ્યુ, ને આમ તેમ જોઈ આંખને ખૂણે સાવ ઓચિંતું આવેલું પાણીનું ટીપું હળવે રહીને એણે લૂછ્યું." પોતાની હથેળીની રેખાઓ તપાસી, રોકી બહુ તોય ધસી આવી ઉદાસી...! "શાને મારે રોજ તારવા ને મારવા, શાને મારે રોજ દાવ માંડવા ને હારવા" કોણ હું ?, કેમ હું ?, કયા મારા કામ છે, લાખો છે રૂપ મારા કરોડો નામ છે...! "કોને પૂછું હું, શાને હું જીવતો ?, ટેભા લઈને સપનાં હું સીવતો." માણસને મારામાં શ્રદ્ધા - વિશ્વાસ છે, મારી સિલકમા તો ઢગલો નિશ્વાસ છે...! "કોની આંખોમાં હું મારી ભિનાસ જોઉં, કોના ચરણ શોધું જ્યાં જઈ મારા પાપ ધોવું." કોણ મને પૂછે, ને કોને જવાબ દઉ, કયા વહીખાતા પાસે મારો હિસાબ લઉ...! "માણસ તો માંગે ને ઈશ્વરને સોંપે, આશાનું બિજ એ મંદિરમાં રોપે." મારે તો આપવાનાં કેટલાં જવાબ છે, માણસની સામે મારો કેટલો રૂઆબ છે...! "પણ મંદિરનાં બંધ દ્વાર, ઢગલાબંધ ફૂલહાર, પ્રભુતાનો ખૂબ આભાર... આભાર..." હોવાની તેજ ધાર, રોજ મારી આરપાર, સણસણતો ખાલીપો મારે છે રોજ માર...! "મારે બસ એકવાર પૂછવું છે કોઈને, ધ્રૂસકાભર રોઈને, કે આ ઈશ્વર બનાવવાનું કોને રે સૂજ્યુ...? "આજે ઈશ્વરની આંખમાં જાણે કંઈ ખૂચ્યુ, ને આમ તેમ જોઈ આંખને ખૂણે સાવ ઓચિંતું આવેલું પાણીનું ટીપું હળવે રહીને એણે લૂછ્યું." લિ. આશા મોદી
પોતાના વિચારોમાં મથતી સ્ત્રી...!! મારા અંદરની આધુનિક સ્ત્રી, સ્વાભિમાની સ્ત્રી, પગભર રહેલી સ્ત્રી, મને જાતમહેનત કરવા પ્રેરિત કરે છે...! એક સ્વપ્ન જોનારી, બિન્દાસ બેજીજક પોતાની વાતો રજૂ કરનારી સ્ત્રી, જ્યારે નવા સંબંધમાં જોડાતી હશે, ત્યારે પોતાના આત્મસન્માનને ટકાવવા કેટલી મથામણ કરતી હશે...? જે પોતાના ખર્ચા પોતે ઉપાડતી હશે, ઘરની જવાબદારી સંભાળતી હશે, એ સ્ત્રી જ્યારે પોતાનો ચહેરો અરીસામાં જોતી હશે, ત્યારે પોતાને કેટલું પંપાળતી હશે...? અને એવામાં, જીવનમાં જો અચાનક જ કોઈ આવી જાય, જે કહીં દે કે, તું નોકરી નહિં કરે આજથી, મારા પૈસા એ તારા પૈસા હવેથી, એ પળે એ સ્ત્રી પોતાના વિશે શું વિચારતી હશે...? આ બંને વિચારોનાં વચ્ચે હું કેટલું અચકાવું છું, કેટલું મૂંઝાવું છું, એની ખબર કદાચ મને પણ નથી પડતી, પણ એટલી ખબર છે કે મારા માટે, મારી મહેનતનો કમાયેલ એક રૂપિયો પણ મારા કામનો, તારા દિધેલા હજારો રૂપિયા પણ એની સામે નકામા...! અઘરું હોય છે, એક વિચારશીલ, સ્વાવલંબી ને સ્વતંત્ર સ્ત્રી માટે, ફક્ત કોઈની પાછળ પાછળ ચાલ્યા કરવું. એ પણ પોતાના વિચારો રજૂ કર્યા વગર...! લિ. આશા મોદી
તું કેમ ખુદને ચાહતો નથી....! તું જેની પાસે રાખે છે આશા, એ જ તારું ધ્યાન રાખતો નથી.. ક્યારેક તો તારી ભીતર તું જો, કેમ તું જ ક્યાંય ફાવતો નથી..? રાત્રે જાગ્યા કરે ને પડખા બદલે, જીંદગી નો લ્હાવો કેમ આવતો નથી..? ને રસ જો ઊડી જાય જીવનમાંથી, તો કોઈ સ્વાદ પણ પછી આવતો નથી.. બધાને પ્રેમથી રાખવાનું તો યાદ રહે છે, મનુષ્ય પોતાને જ દિલથી ચાહતો નથી.. તારી જ તારે મદદ કરવી પડશે સમજ, ભલું કરવા ઈશ્વર બધે આવતો નથી.. લોકોની આગળ લાચાર બેસી રહે છે, તું તારામાં વિશ્વાસ કેમ રાખતો નથી..? બીજાની પ્રગતિથી બળે છે એટલો કે, બીજાની ખુશીઓમાં ક્યારેય નાચતો નથી! - આશા મોદી ✍️
આજે મારે ફરી બાળક થવું છે...!! મોટાઓની મોટાઈ જોઈને થાકી, મારે તો ફરી નાના બનવું છે. આજે મારે ફરી બાળક થવું છે.!! જીંદગીની વ્યસ્તતામાં મારી નીંદર સ્વપ્ન બની ગઈ, આજે મારે ફરી સપનાઓવાળી મીઠી નીંદર માણવી છે. આજે મારે ફરી બાળક થવું છે.!! દોસ્તો સાથે પ્રથમ શોમાં ફિલ્મો તો જોવા લાગ્યા, આજે મારે ફરી પ્રથમ વરસાદમાં દોસ્તો સાથે પલળવું છે. આજે મારે ફરી બાળક થવું છે.!! જીંદગીના પાઠ તો સૌ આજે શીખવા લાગ્યા, પણ આજે મારે ફરી કક્કો - બારાક્ષરી શીખવી છે. આજે મારે ફરી બાળક થવું છે.!! ઈન્સ્ટાગ્રામ અને વોટ્સએપ પર સ્ટેટ્સ લગાવતા થઈ ગયા, પણ આજે મારે ફરી લેશનડાયરી માં લેશન લખવું છે. આજે મારે ફરી બાળક થવું છે.!! ટ્રાફિકમાં કાર-બાઈક ચલાવતા થઈ ગયા, આજે મારે ફરી દોસ્તો સાથે સાઈકલની રેસ લગાવી છે. આજે મારે ફરી બાળક થવું છે.!! નથી ખાવા મોંઘી હોટલોના પીઝા - બર્ગર, પણ આજે મારે ફરી ચોકલેટ માટે જીદ કરવી છે. આજે મારે ફરી બાળક થવું છે.!! જીંદગીની પરીક્ષામાં વેકેશન તો ખોવાઈ ગયા, પણ આજે મારે ફરી પરીક્ષા પછીનું વેકેશન માણવું છે. આજે મારે ફરી બાળક થવું છે.!! મોંઘા મોબાઈલ અને કમ્પ્યૂટર તો સૌ વાપરવા લાગ્યા, પણ આજે મારે ફરી એ જ દડીથી ક્રિકેટ રમવું છે. આજે મારે ફરી બાળક થવું છે.!! તહેવારોની શુભેચ્છા માટે ભેટ સૌ આપતા થઈ ગયા, પણ આજે મારે ફરી પરિવાર અને દોસ્તો સાથે તહેવાર મનાવવા છે. આજે મારે ફરી બાળક થવું છે.!! દોસ્તો સાથે મળવાનો પ્લાન બનતા તો મહિનાઓ થવા લાગ્યા, પણ આજે મારે ફરી એ દોસ્તો સાથે રોજનો નાસ્તો માણવો છે. આજે મારે ફરી બાળક થવું છે.!! જીંદગીના સફરમાં સૌ મોટા થઈ જવાબદારીમાં ખોવાઈ ગયા, પણ આજે મારે ફરી એ કોઈ શાંત એકાંત ખૂણે બેસવું છે. આજે મારે ફરી બાળક થવું છે.!! એવા તો બીજા ઘણા કિસ્સાઓ છે જે યાદો બની ગયા, એ યાદોને ફરી તાજી કરવા આજે મારે ફરી બાળક થવું છે.!!
સમાધાન આપ!! મને ખબર છે, તું રહે મારા મનમાં, છતાં આજે સાક્ષાત્કાર આપ ! તને જોવાની, સ્પર્શવાની ઝંખના છે, આ ઝંખનાને થોડો આરામ આપ ! વર્ષોથી આંખોમાં પ્રેમનાં વાદળો બાંધ્યા, આ વાદળોને વરસવાનું કારણ આપ ! તારી મોરલી એ બધાને નચાવ્યા, આજે થોભવાનો નાદ આપ ! તું દેખાય અને પછી ક્યાંય ન જાય, આ હાથોને એવું વરદાન આપ ! તારા દેવળે દર્શન કરવા ખૂબ તરસ્યા, હવે તારી પાસે રહેવા થોડું સ્થાન આપ ! જેના હજારો છે નામ એવા હે જગતના નાથ, લાગણીઓને માન આપી મારા મનને સમાધાન આપ !
મારે મન શ્રીકૃષ્ણ એટલે...! ❤️ કોઈ કહે કૃષ્ણ, કોઈ કહે માધવ, કોઈ કહે માખણચોર, કોઈ કહે ગિરધર, કોઈ કહે મોહન, કોઈ કહે મુરલીધર, કોઈ કહે રાધાનો શ્યામ, તો કોઈ કહે મીરાંનો કાન, કોઈ કહે રુક્મિણીનો નાથ, કોઈ કહે નંદનો ગોપાલ, તો કોઈ કહે માતા જશોદાનો લાલ...! પણ મારે મન શ્રીકૃષ્ણ એટલે... મનભાવન... મારા જીવનનો આધાર! છે એ નટખટ, નિશ્છળ, નિષ્કપટ, વાસના રહિત ને સદાય તોય એ પ્રેમાળ! જે ગોપીઓના વસ્ત્રો ભલે ચોરે, છતાંય સ્ત્રીના માટે સદાય આદરણીય, મારે મન કહું તો સહજ પ્રાકૃતિક પુરુષ! એક એવો પુરુષ જે તમામ સ્ત્રીને પ્રિય હોય, એવો પુરુષ કે જેનાં પર પ્રિત છલક્યા જ કરે! જેને પ્રેમ પણ ... પ્રેમથી કરી શકાય... અને નફરત પણ ... પ્રેમથી કરી શકાય... જેને સવાલ પૂછતાં એ સવાલોમાં જ જવાબ મળી જાય, જેની આગળ હૈયું ખોલીને વાત કરી શકાય...! જેને ગુસ્સામાં ખખડાવી પણ શકાય...! એના શરણે આવેલ સૌ જીવ-સૃષ્ટિ એ સ્વીકારી લે, એની આગળ કોઈ નાના-મોટા નો આભાસ જ ના થાય. એની ભક્તિની શક્તિથી જ મારું સમગ્ર અસ્તિત્વ દિપી ઉઠે ...! મારે મન શ્રીકૃષ્ણ એટલે.... મનભાવન... મારા જીવનનો આધાર!
Copyright © 2024, Matrubharti Technologies Pvt. Ltd. All Rights Reserved.
Please enable javascript on your browser