ઠેરઠેર તપાસી જોયું, ક્યાંય નથી ' બાપુ ' આજે.
જાણે કેટકેટલું ખોયું, ક્યાંય નથી ' બાપુ ' આજે.
સત્યના પ્રયોગો થયા સૂના અસત્ય સઘળે પ્રકાશે,
મા ભારતીએ અશ્રુ સાર્યું, ક્યાંય નથી ' બાપુ ' આજે.
હિંસાની હોળીમાં રખે દેશ જાય ભરખાતો આખરે,
અહિંસાનું શસ્ત્ર દોહ્યલું, ક્યાંય નથી 'બાપુ 'આજે.
ત્રણ ગોળીના પ્રહારે હર્યાં પ્રાણ સાબરમતીના સંતના,
દેશે સર્વસ્વ ગુમાવ્યું, ક્યાંય નથી ' બાપુ ' આજે.
નયન ઊભરાયાં નિર્વાણદિને ૠણ યાદ કરતા તમારું,
દેશકાજે કેટકેટલું કર્યું, ક્યાંય નથી ' બાપુ ' આજે.
જોડ તમારી ના મળે, અલંકારે છો અનન્વય ' બાપુ',
રાષ્ટ્રપિતાનું બિરુદ ધર્યું, ક્યાંય નથી ' બાપુ ' આજે.
- ચૈતન્ય જોષી. " દીપક " પોરબંદર.
