વિચારનું આવવુંને શબ્દનું ઉચ્ચરવું ઉભય હારોહાર.
શબ્દનું સંભળાવુંને અર્થનું પ્રકાશવું ઉભય હારોહાર.
હોય ભલેને મધુભાષી તોય કાંટાની જેમ ખૂંચનારા એ,
સત્યનું અનાવૃત થવુંને દુઃખ નીપજવું ઉભય હારોહાર.
હશે એ દર્પણ સમા જે મનમુખે એકરૂપતા જાળવતાં,
નાવનું હંકારવુંને સરિતાને સહજ વહેવું ઉભય હારોહાર.
ના દેખાય ભૂલ કદીએ નિજની આપણાં આચરણની,
ઔપચારિક દેખાવુંને જુદું જ વિચારવું ઉભય હારોહાર.
હોઈ શકે કાગતાડવત્ ઘટના કે સત્ય સહજ પ્રગટતું,
બહાનાં ધરવાંને સત્યને આવૃત રાખવું ઉભય હારોહાર.
- ચૈતન્ય જોષી. ' દીપક ' પોરબંદર.
