કરી કામ થાક્યો તો બેકારી માંગી
બધાને થયું કે ગુનેગારી માંગી
મને એણે બાળક બનાવ્યો ફરીથી,
પછી મારી પાસે સમજદારી માંગી.
મદદ કરવા રાજી થયા સૌ પરંતુ,
આ ચહેરા ઉપર સ્હેજ લાચારી માંગી
કબૂતરને પૂછ્યું કે શું જોઈએ છે?
છે અચરજ કે એણે ગિરફતારી માંગી.
વધારે તો આનાથી શું સાદગી હોય?
નથી કોઈ ઘટનાય ચકચારી માંગી
પછી એ ઊભી છે અરીસાની સામે,
પ્રથમ તો અરીસાની તૈયારી માંગી
મળ્યો ઢાળ ત્યાં ત્યાં ઢળી જે ગયું છે,
એ પાણીની પાસેય ખુદ્દારી માંગી !
આ હાથોથી તલવાર છૂટી નહી તો
ન છૂટી શકે એવી કંપારી માંગી
ન મહેનત કરી, સાધના પણ કરી નહીં,
ચૂકવણું કરીને કલાકારી માંગી
હજી હસતા- હસતા હું જીવી રહ્યો છું
તમે બદદુઆ પણ નથી સારી માંગી.
ભાવિન ગોપાણી
