જીવનથી હારી ગયેલી નિશા ઘરના આંગણે ઉભી રહી પોતાના નસીબ ને કોસી રહી હતી. ત્યાં અચાનક જ એની નજર એક કરોળિયા ઉપર પડી. કરોળિયો જોત જોતામાં કેટલીય વાર જમીન પર પછડાયો પણ પાછી હિંમત ભેગી કરીને પોતાનું ઘર બનાવવામાં લાગી ગયો. ભલે ઘર એના નાજુક તાંતણાનું છે પણ ગૂંથયું છે ઘણુ મજબુત.
કરોળિયો જાણે એક મિસાલ બનીને જિંદગીના પાઠ સમજાવતો હોય કે પડ્યા વગર ક્યાં કાંઈ શિખાય છે, હિંમત હારી ને બેસવાથી સફળતાનો સ્વાદ ક્યાં ચખાય છે. ઘર ભલે નાજુક તાંતણા નું હોય પણ મજબૂત ગૂંથવાનું આપણે જ હોય છે.
નિશા ફરી પોતાની જિંદગી ને મજબૂત તાંતણા થી ગૂંથવામાં લાગી ગઈ. આજે નહીં તો કાલે સફળતા જરૂર મળશે એજ આશા સાથે તુટેલા સબંધો ને એક માળામાં પરોવતી ગઈ.
#મિસાલ
