મ્હેંકતી ગુલાબજળની છાંટ જેવી છું સજન,
આવ, ડુબકી માર ગંગાઘાટ જેવી છું સજન.
ઝળહળાવી ના શકું દીવાનખાનાને છતાં,
ગોખમાં જલતી રહેલી વાટ જેવી છું સજન.
હોય જેને થાક મબલખ, ને વિસામાની કદર,
એમના માટે હિંડોળાખાટ જેવી છું સજન.
કેમ જોડી જામશે તું કિંમતી રેશમ સમો,
હું તો ખરબચડી ને માદરપાટ જેવી છું સજન.
કોઇપણ કળ વાપરી ખોલી શકાતું'તું કદી,
એ જ તાળા પર ચડેલા કાટ જેવી છું સજન.
ભલભલા અડધી રમતથી કેમ ભાગી જાય છે?
તું કહેને, હું કોઈ ચોપાટ જેવી છું સજન?
હું જ અંદર જળકમળવત્ ,હું જ અંદર જોગણી,
બ્હારથી હું રુપ-રસની ફાંટ જેવી છું સજન.
- પારુલ ખખ્ખર
