અષાઢના ભવાડા ! ! !
*આવા કરવાના ભવાડા ?*
અષાઢ તારે આવા કરવાના ભવાડા ?
કોરા કાઢે છે સાવ દા'ડા !
અષાઢ તારે આવા કરવાના ભવાડા ?
એક તો તું માંડ માંડ વર્ષે આવે
ને પાછો આ રીતે મોઢું મચકોડે ?
વાદળ નહીં, વીજળી નહીં, ગરજે પણ નહીં
અને તડકે જઈ માથા તું ફોડે ?
સોબત ખરાબ તારી થઈ ગઇ છે શું
કે પછી ઉતરે છે કોઈ તારી આડા ?
અષાઢ તારે આવા કરવાના ભવાડા ?
વરસી પડે તો જાત ઓગાળી નાંખવામાં
પોતે ક્યાં રાખે છે ખ્યાલ ?
ખેતરના એક એક ઢેફાને જોઇ લે તું
કેટલુ કરે છે તને વ્હાલ !
પાકેલા ચોમાસે તડ પડી જાય
તો તો નિસાસા'ય નાંખે નીંભાડા !
અષાઢ તારે આવા કરવાના ભવાડા ?
કૃષ્ણ દવે
તા-૧૮-૭-૨૦૧૯
અષાઢ વદ-૨
