સાંજને શું ? એ તો પડે !
એને કાંઇ કશું ના અડે.
તારી ગેરહાજરી ના નડે !
સાંજને શું ? એ તો પડે !
તું જોડે ના હોય તો
એવી સાંજને સાંજ શું કહેવી ?
આભમાં રંગોની રંગોળી
કેમ કરીને સ્હેવી ?
સાંજને સાંજની ઓળખ મળતી
કેવળ તારા વડે
પણ સાંજને શું ? એ તો પડે !
એક બાંકડે બેઠા બેઠા
રાહ ગમે જોવાની
આવીશ ? કે નહીં આવે ?
એની શંકા પણ હોવાની
નજરમાં તારો રોજનો રસ્તો
રહી રહીને ચડે
સાંજને શું ? એ તો પડે !
એ જ બાંકડો, એકલો હું ને
સમય નહીં ઓગળે
રંગ વિનાની સાંજ
ગલીમાં આવતી સામે મળે
એક થાંભલો લાઇટનો
છાનું એકલું એકલું રડે
પણ સાંજને શું ? એ તો પડે!
# સૌ. ટ્વિટર
