ફરી નવા અહેસાસ કલમ માં કંડારવાનો પ્રયત્ન.... દિવાળીની રોશનીનો ઝગમગાટ ને ધુમાડો થઈ ને ઊડતી સમૃદ્ધિ. ખેર જવા દો આનંદ જેને જેમાં મળે એ એમાંથી મેળવી લે, પણ મારે વાત કરવી છે એક વ્યક્તિત્વની. ને એ વ્યક્તિત્વ એટલે એવું જેમાં મને ડૂબી જવાનું મન થાય. હું હંમેશા શાંતિની શોધ મા તેની પાસે જઉં ને એ સામે કહે તને મળે તો મનેય થોડી મોકલજે, ને છતાં શોરબકોર પોતામાં સમાવી લેતું એ વિરાટ વ્યક્તિત્વ. મારા ઉદ્વેગો હંમેશા હરી લઈ, મને હળવી કરી દે. નજીક જાઓ તો પારકું ને અલિપ્ત વ્યક્તિત્વ ને દૂર જાઓ તો પોતાની તરફ ખેંચતુ. બહારથી ઠંડોગાર ને અંદરથી ધધકતો. એ કહે મને શું ફર્ક પડે મારે તો રોજ તહેવાર તારા જેવો કોઈને અહેસાસ થાય એ જ મારો ઉત્સવ. ને આવા તો અનેક અહેસાસો ને આહલેકો, ધુમાડા ને ધર્મ, કિસ્સા ને કહાનીઓ પોતામાં સમાવી ને એ અડીખમ ઉભો જ રહે છે. નરસૈંયા ની કરતાલ સાથે એ રોજ વાતે વળગતો હશે ત્યારે કેવા સુર નીકળતા હશે નહિ! વાહ મારા દત્ત ગિરનાર... સદા અડીખમ રહો...
