ગઝલ#
આખરે તો સૌ સમયની બાનમાં આવી ગયા
મોં છુપાવી ક્યાં જવું? કર્મો હવે આંબી ગયા
તાતના પણ તાત હોવાના ભરમમાં જે હતાં
એ ખરી ઔકાત પોતાની હવે માપી ગયા
ખગ,પશુ કોઈ નહીં, બસ છે સકંજો આપ પર
એકતરફી દંડનુ કારણ તમે જાણી ગયા?
કૈદ આજીવન કર્યા છે કંઈક જીવો જેમણે
લ્યો!હવે એ ચાર દી'ની કૈદથી થાકી ગયા!
ચિત્ર લીલું છમ હતું ત્યાં રંગ કાળો ભેળવ્યો
ભૌમની સંતાન થઈ એની ચુનર બાળી ગયા
છે જે સર્જનહાર એ ખુદ ધ્વંસ કારક થઈ ગયો!
ક્રોધની એ હદ સુધી એને તમે તાણી ગયા
ખેલ કુદરત સંગ ખેલી ગ્યા ઘણો મોટો તમે
એક નાના ખેલમાં એના તમે હાંફી ગયા
ચાહત
