ભીંત્યુએ ચોડેલા કંકુના થાપામાં
ઉભરાતી શૈશવની યાદ,
એકેય ડગલુ ન આગળ ચલાય
હવે કોને જઇ કરવી ફરિયાદ....
આગળ અનાગતનાં મીઠા છે શમણા
ને પાછળ છે સ્મરણો અતીતના,
બન્ને બાજુથી હું ખેંચાતી જાઉ
મને ખેંચે છે દોર હેત-પ્રીતના,
આજે સંભળાય મને એવા કંઇ સુર
જયાં મંદ લાગે ઢોલકના નાદ.... ભીંત્યુએ ચોડેલા.....
અલ્લડતા આવીને આંગણીએ ઉભી
ત્યાં બારણાઓ કીધા છે બંધ,
એવી રીતે જ મારે સ્મરણોથી તોડીને
શમણાએ જોડવો સંબંધ,
મને સૌભાગ્ય આંગણીએ બોલાવે કોઇ
દઇ સેંથાનો સિંદુરિયો સાદ...... ભીંત્યુએ ચોડેલા......
~ વૃજલાલ રૂપાણી 'વિસ્મિત'
