ગઝલ:ગગનમાં જો કરે તું છેદ તો માનું
ગુમાની લે હવાને હાથમાં કર કેદ તો માનું
ને પથ્થરથી ગગનમાં જો કરે તું છેદ તો માનું
વગર હથિયાર લીધા પ્રાણ નિયમ યુદ્ધના ફગાવીને
અમાનુષ એ જ ઘટનાનો કરે જો ખેદ તો માનું
અલગ છે તું જો મારાથી તો લે સાબિત કરી દે ને
બતાવી દે આ દુનિયાને જો નીરક્ષીર ભેદ તો માનું
ગઝલ છાંદસ અછાંદસ નાટકો તે બહુ લખ્યા વાંચ્યા
છતાં પંડિત તું સર્જે પાંચમો જો વેદ તો માનું
કરે અપમાન કોઈ ત્યારે ટુકડા થાય એ પ્હેલાં
કરે તારા અહંનો જાતે તું વિચ્છેદ તો માનું
રમેશ ચૌહાણ