મનવગર કંઇ માળવે પહોંચાય નહીં
હોય મન,તો કોઇને પૂછાય નહીં !
શું અસર કરશે ગળે ઉતર્યા પછી
એ વિચારે,ઝેર કંઇ પીવાય નહીં !
તડ પડે તો તૂટવું નક્કી જ છે
એ વિષયમાં કોઇથી કંઇ થાય નહીં
જે નથી એ પામવાની લાહ્યમાં
હોય,એના મૂલ્યને ભૂલાય નહીં
બુદ્ધિશાળી આપણે સાબિત થવા
અન્યને કહી મૂર્ખ,તરછોડાય નહીં !
રહી શકીએ નહીં કમલવત આપણે
એટલે કંઇ જળને વખોડાય નહીં !
છે ઘણાં બીજા ય રસ્તાઓ અહિ,
ઘર બાળીને કંઇ તિરથ યોજાય નહીં !
