દલપતકાકા ભુપતની વાત વ્યવસ્થિત સાંભળવા માટે કુલદીપના પપ્પાને બેઠક રૂમમાં લઈ ગયા. બેઠક રૂમમાં કુલદીપના પપ્પા બાંકડા પર આંટીએ પગ ચડાવીને દલપતકાકાની સાવ નજીક ભુપતની દરેક વાત કહેવાની ચલુ કરી.
"ભુપત પ્રવિણનો ભાઈબંધ છે, પણ એ સાથે ભુપત પેલી છોરીને પામવા માટે કોઈ પણ હદ સુધી જઈ શકે એમ છે."
કુલદીપના પપ્પા જે કાંઈ કહી રહ્યા હતા, એ ધીરે ધીરે દલપતકાકાના મનમાં વાત ઊતરી રહી હતી.
"તમારું એવું માનવું છે, કે ભુપતને પણ પેલી છોરી ગમે છે ?"
"માનવું નહીં પણ એ જ સાચુ છે. ભુપતે પેલી છોરીના કાનમાં એવી વાત નાખી કે પ્રવિણે એ બન્નેના સંબંધને અડધા સોમનાથમાં કહી દીધી છે. જેથી એ છોરી આબરુ સાચવવાં માટે પ્રવિણ સાથે લગ્ન કરી લે. આમાં એ છોરીનો એ જ દોષ કે એણે ભુપતની વાતને માની લીધી. પ્રવિણ પિતા નથી બની શકતો ભુપતે એ છોરીનાં કાનમાં એવી રીતે તેલ રેડ્યું કે છોરીનો ક્રોધ સાત આસમાન પર ચડી ગયો હતો."
કુલદીપના પપ્પાએ ભુપતની મૈલી ભગત દલપતકાકાને કહી જણાવી. દલપતકાકાને વિશ્વાસ આવી રહ્યો ન હતો કે પ્રવિણનો ભાઈબંધ થઈને ભુપતે એના પીઠ પાછળ વાર કર્યો. દોસ્તીના સંબંધમાં પ્રવિણ બીજીવાર થાપ ખાય બેઠો. આ વાતથી દલપત કાકાને એટલુ દુઃખ થયું હતું. જો આ વાત પ્રવિણને જાણવા મળશે તો એને ભાઈબંધના નામ પરથી વિશ્વાસ ઊઠી જશે.
"તમને આ વાતની જાણ કઈ રીતે થઈ ?" દલપતકાકાએ છેલ્લો સવાલ કર્યો.
"અરે તમે ઘરની બહાર નીકળો તો વાત જાણવા મળે. મારી ઘરે ભુપત આવ્યો હતો. એણે મને કહ્યું કે પ્રવિણ મારો દોસ્ત હોવા છતા મારા મનની વાત સમજી ના શક્યો. એ પછી એ છોરીના પાડોશીએ મને ભુપતની દરેક વાત કહી. એણે કઈ રીતે એ છોરીને પોતાનાં વિશ્વાસમાં લઈ લીધી. ભુપત અને એ છોરીનાં લગ્ન નક્કી થઈ ગયાં છે. ત્રણ મહિનાની અંદર એ લોકોનાં લગ્ન છે."
ભુપતનાં લગ્ન પ્રવિણે પસંદ કરેલી છોરી સાથે થવાનાં છે. એ વાત જાણીને દલપતકાકાને આંચકો લાગ્યો.
"અરેરે..કોઈ મોહમાં એટલુ આંધળુ થઈ જતુ હશે કે એના દોસ્તની આવી હાલત કરનાર છોરી સાથે એ ચાર ફેરા ફરવાં તૈયાર થઈ ગયો. એ છોરીએ કદી મારા દીકરાને પોતાનો નહીં માન્યો હોય કે એની આવી હાલત કરવાથી એનું હૃદય તો ના દુભાવ્યું પણ એનો જે દોસ્ત હતો એની સાથે પરણવા તૈયાર થઈ ગઈ. વાહ રે સોમનાથ દાદા તમારી લીલાને તમે જ જાણી શકો છો." દલપત કાકા મનમાં વિચાર કરવા લાગ્યા.
"તમે આજ્ઞા આપો તો હવે હું જઈ શકું છું ?"
વિચારોમાં ખોવાયેલા દલપતકાકાના ખભાને હલાવતા કુલદીપના પપ્પાએ ઘરે જવાની રજા માંગી. દલપતકાકા કુલદીપના પપ્પાના હાથનો સ્પર્શ થતા વાસ્તવિકતામાં પાછા આવ્યા : "તમે આ વાત પ્રવિણને કહેતા નહીં. ડૉકટરે આવી વાતોથી પ્રવિણને દૂર રાખવાનું કહ્યું છે."
દલપતકાકાએ એમનો હાથ પકડતા વિનંતી કરવા લાગ્યા. કુલદીપના પપ્પાએ જણાવ્યું કે આ વાત પ્રવિણ સુધી કોઈ કાળે પહોચશે નહીં.
દલપતકાકા એ કુલદીપના પપ્પાને ઘરે જવાની રજા આપી દીધી. દલપત કાકા એમના બાકીના કામોમાં પરોવાઈ ગયાં. પ્રવિણની તબિયત ધીરે ધીરે સ્વસ્થ થવાનું નામ લઈ રહી હતી. એનાં વિરુધ્ધમાં એની મમ્મીની તબિયત દિવસેને દિવસે બગડવા લાગી.
બે મહિના પછી પ્રવિણને કોઈ ડ્રેસિંગની જરૂર પડી નહીં. એના ચહેરા પરથી પાટો નીકળી ગયો હતો. ડૉકટરે એને દરેક વસ્તુ ખાવાની છુટ આપી દીધી હતી. ચહેરો હજી લાલાશ પડતો હતો. જમણી સાઈડનું જડબુ સાવ બેસી ગયુ હોવાથી પ્રવિણ એ સાઈડ કોઈ વસ્તુ ખાય શકતો ન હતો.
પ્રવિણે પોતાના ચહેરા પર ગમછો પહેરીને નોકરી પર જવા માટે તૈયારી કરી લીધી હતી. બે મહિના તો એ કોઈપણ રીતે ઘરે રહ્યો હતો. એ પછી એણે નક્કી કરી લીધું કે કાંઈ પણ થાય રજાના દિવસે એ ઘરે બેસી નહીં રહે.
બે મહિના પછી પ્રવિણ નોકરી પર ચડી ગયો. પંચાયતમાં કામ કરતા એના પરિચિત લોકો એની ખબર અંતર પૂછવાં લાગ્યાં. એની નીચે કામ કરનાર લોકોએ પ્રવિણને પૂરો દિવસ આરામ કરવા દીધો. એ દિવસે પ્રવિણે જરૂરી કાગળ પર સાઈન કરવા સિવાય બીજું કોઈ કામ કરવા દીધું નહીં.
પંચાયતમાં કામ કરનાર એક વ્યક્તિ પ્રવિણની ખબર કાઢવા એની કેબીનમાં ગયો.
"પ્રવિણભાઈ, હવે તમારી તબિયત કેવી છે ?"
પ્રવિણ હાથની પેન ટેબલ પર મુકતા કહ્યુ : "જેવો છું એ તમારી સામે છું. બે મહિનામાં ઘણો સુધારો આવી ગયો છે. ડૉકટરે દરેક કામ કરવાની છુટ આપી દીધી છે, તો આજથી નોકરી ચાલું કરી દીધી."
"સારુ તમને જલ્દી રિકવરી આવી ગઈ. તમારા દોસ્તના મેરેજમાં તમે એટેન્ડ થઈ શકશો."
"મારા દોસ્તના મેરેજ !" પ્રવિણે થોડોક વિચાર કરીને આગળ બોલ્યો : "ઓહ્ તારા મેરેજ થવાના છે. આ તો ખુશીની વાત છે. હું તો તારા ઈન્વીટેશન વિના પહોંચી જઈશ." પ્રવિણે એ વ્યક્તિને અભિનદન આપવા હાથ લાંબો કર્યો.
"સોરિ હો મારા કોઈ મેરેજ થવાના નથી. હું તો તારા જીગરી દોસ્ત ભુપતની વાત કરુ છુ."
એ વ્યક્તિ પાસે ભુપતના લગ્નની વાત જાણીને પ્રવિણને આશ્ચર્ય થયું.
"કોઈએ ખોટી અફવા ફેલાવી હશે. ભુપત તો બે મહિનાથી સોમનાથની અંદર નથી. એ બહાર ગામ છે. ભાઈ, એના મેરેજ હોય તો મને ખબર પડ્યા વિના રહે નહીં." પ્રવિણે એની સ્ટાઈલથી કહ્યું.
"મને માફ કરી દેજો, પણ અફવા તમને કોઈએ ફેલાવી હશે. ભુપત બે મહિના સોમનાથમાં છે. મારા કાકાનો દીકરો એની કંપનીમાં નોકરી કરે છે. ભુપતના મેરેજનું ઈન્વીટેશન મારા કાકાના દીકરાને મળેલું છે. એણે મને કહ્યું એટલે તો મેં તમને કહ્યું. મને ખબર છે કે તમે બન્ને ખાસ દોસ્ત છો."
"એવું પણ બની શકે કે ભુપત નામના બે વ્યક્તિ એ જ કંપનીમાં કામ કરતા હોય."
"એવું કોઈ પણ રીતે ના બની શકે. જે ભુપતના મેરેજ થવાના છે એ હજું કંપનીમાં નવો જોઈન થયો છે. તમે પણ કહ્યું હતું કે તમારો દોસ્ત ભુપત નોકરીએ લાગી ગયો છે."
પ્રવિણ વાત જાણીને વિચારમાં પડી ગયો : "એવું કઈ રીતે બની શકે ? ભુપત અહી જ હતો તો કાકા મારી પાસે ખોટું કેમ બોલ્યા કે સોમનાથની અંદર નથી. મારી સાથે આટલી મોટી ઘટના બની તો એકવાર પણ એ મને મળવા ના આવી શક્યો."
પ્રવિણ વિચારોમાં મગ્ન થઈ ગયો. ભુપતના મેરેજની વાત સાંભળીને એના મગજમાં ઘણા સવાલો ઉત્પન્ન થઈ ગયા. આ સવાલોનો જવાબ એને કુલદીપના પપ્પા પાસે મળવાનો હતો; પ્રવિણ એ પણ જાણતો હતો.
સાંજે છ વાગ્યે નોકરી પર છુટીને પ્રવિણ ડાયરેક્ટ કુલદીપના ઘરે ગયો. પ્રવિણને ઘણા દિવસો પછી પોતાના ઘરે આવેલો જોઈને કુલદીપના પેરેન્ટ્સને ઘણો આનંદ થયો હતો.
પ્રવિણે તેઓ બન્નેનાં ચરણ સ્પર્શ કરીને આશીર્વાદ લઈ લીધાં. કુલદીપનાં મમ્મીએ એને આવકાર આપતાં ખુરશી પર બેસાડ્યો.
"કાકા, હું તમારી પાસે એક વાત જાણવા આવ્યો છું. મને આશા છે કે હવે તમે મારી પાસે કોઈ વાત છુપાવશો નહીં."
"બોલ તારે એવી કઈ વાત જાણવી છે. આજ સુધી હું કોઈ દિવસ તારી પાસે ખોટું બોલ્યો જ નથી તો હવે ખોટું બોલવાનું આવે નહીં." કુલદીપના પપ્પાએ એની સામે ખુરશી પર બેસતા કહ્યું.
"ભુપત સોમનાથમાં નથી, એવી ખોટી વાત તમે જ મને કહી છે. ભુપત એની કંપનીમા રોજ ભરે છે. હું પ્રુફ લેવા જઈશ તો મને પ્રુફ પણ મળી શકે છે. એનાં લગ્ન થવાના છે અને એ મને કહેવા પણ ના આવ્યો." પ્રવિણે દુઃખ સાથે કહ્યું.
પ્રવિણની વાત સાંભળીને કુલદીપના પપ્પા ક્ષોભીલા પડી ગયા. હવે પ્રવિણને સાચી હકીકત જણાવી દેવા સિવાય કોઈ છુટકો ન હતો.
"હા, હું તારી પાસે ખોટું બોલ્યો હતો કે ભુપત સોમનાથની અંદર નથી, કારણ કે હવે ભુપત તને નફરત કરે છે. એ તારી સાથે કોઈ સંબંધ રાખવા માંગતો નથી. આ વાત એણે ખુદ એના મુખે મારા ઘરે આવીને કહી."
(ક્રમશઃ...)
✍️મયુરી દાદલ"મીરા"
