एक सुरेख प्रार्थना ?
गळ्यामधे माळ दे, हाता मध्ये टाळ दे।
देवा मला एक तरी अशी संध्याकाळ दे॥
संगीताचे ज्ञान दे, कंठामध्ये तान दे।
तुझे गीत गाता यावे असे वरदान दे॥
मायेसाठी माय दे, वारी साठी पाय दे।
तुझी कृपा कामधेनू, अशी एक गाय दे॥
दिस भर काम दे, पोटापुरता दाम दे।
चिंता दूर करावया ओठी तुझे नाम दे॥
कष्ट आणि चार दे, सोसायाला जोर दे।
खांद्यावर देवा तुझ्या पालखीचा भार दे॥
ध्रुवापरी स्थान दे, कर्णापरी दान दे।
श्रावणाच्या सेवेपरी थोडसं ईमान दे॥
तुकोबाची वीणा दे, ज्ञानियाची करुणा दे।
मूर्त डोळा, पायी माथा ठेवुनीया मरणा दे॥
मागू किती राहू दे, सारे एके ठायी शोभु दे।
ब्रह्मचैतन्य गुरू मला, जन्मो जन्मी लाभू दे॥
