એકલો ઉભો હોઉ,ને તોય લાગે કે હોઉ મેળામાં,
એવું લાગ્યા કરે છે રોજ મને તારા સથવારામાં,
આમ તો અત્તર લગાવવાની આદત નથી જરાય મને,
તોય મહેકી ઉઠે છે શ્વાસ મારા તારા પડછાયામાં,
મારા ખોવાયાની ફરિયાદ દાખલ થાય તો ચેતી જજે,
પકડાશે આંખો તારી,ડુબી જાઉં છું હું કાયમ,જ્યાં પલકારામાં,
તું આવે,બોલાવે,ને રેલાવે સ્મિત જ્યાં જરી નજર ફેરવું,
એવું બધું રોજનું છે મારે,સપનું હોય કે ભણકારામાં,
જાણી દશા મારી,કહે છે લોક કે જાવ તબીબો પાસે,
એમને શું ખબર? શું મઝા છે આ રોગના વરતારામાં.
- નિર્મિત ઠક્કર (૧૫/૧૨/૨૦૨૨)
