જરા ધ્યાન રાખજો.!

ચર્ચા છે ચારેકોર, જરા ધ્યાન રાખજો !
ઘુવડ બન્યા છે મોર, જરા ધ્યાન રાખજો !

કુંફાડશે બધે જ પ્રલોભનના અજગરો
છે ચુંટણીનો દોર, જરા ધ્યાન રાખજો!

રઘવાયા થઈ ફરે છે બધા લોકસેવકો !
જાણે કે ભુખ્યા ઢોર, જરા ધ્યાન રાખજો !

ઘરડા-ઘરે જ શોભે જે એવા વડીલ પણ
મારી રહ્યા છે જોર, જરા ધ્યાન રાખજો !

જે દેખવામાં લાગે છે ભોળાં કબુતરો
મારી ન જાય ન્હોર, જરા ધ્યાન રાખજો !

આવી ગયા છે ગેલમાં ચમચાઓ પણ તમામ
છે કંઈ અજબનો તોર, જરા ધ્યાન રાખજો !

સેવક નથી કે આ તો છે સત્તાના ભીક્ષુકો
નઘરોળ ને નઠોર, જરા ધ્યાન રાખજો !

ચેતો કે ચેતવે છે બટણ લાલ રંગનું
ફાવે ન ધુર્ત-ચોર, જરા ધ્યાન રાખજો !

ગજવે છે મંત્ર ખુબ મુસાફીર વીકાસનાં -
ખોદે ન એ જ ઘોર, જરા ધ્યાન રાખજો !

- મુસાફિર પાલનપુરી

Gujarati Poem by મહેશ ઠાકર : 111831215

The best sellers write on Matrubharti, do you?

Start Writing Now