*કોઈ કલા સ્વરૂપે, જગતથી જુદા બનો,*
*નકશો બનો, કવિતા બનો, વારતા બનો.*

*અવગણના એક વાત અલગ છે, શરમ જુદી,*
*વિવશતા ત્રીજી વાત છે, બસ ત્યાં જ ના બનો.*

*પગભર તો છો તમે, હવે આગળ તમારું કામ,*
*રસ્તો બનો તમારો તમારી દિશા બનો.*

*છે પ્રેમ એને યાદગીરીની જરૂ૨ છે,*
*કંઈ પણ અગર બની ન શકો, બેવફા બનો.*

*મહેફિલ હો દોસ્તોની કે જાહેરસભાનો મંચ,*
*જ્યાં પણ જવાનું થાય, તમારી જગા બનો.*

*દુનિયાનું આખું ક્ષેત્ર એ સાહિત્ય ક્ષેત્ર છે,*
*એમાં કોઈ કવિતા બનો વારતા બનો.*

*હો ઉપકરણ અનેક, ના એની નથી જરૂર,*
*બે ત્રણ પ્રસંગ ગૂંથી સળંગ વારતા બનો.*

*કિશ્તી અમારી કોઈ રીતે ડૂબતી નથી,*
*એક જ ઇલાજ છે કે તમે નાખુદા બનો.*

*જોવું છે કેટલો છે, તમારા હૃદયમાં પ્રેમ,*
*મારા નહીં તો કોઈ બીજાના જરા બનો.*

*ચૈતન્ય હક છે પ્રેમનો, શોભા છે રૂપની,*
*એ વાજબી નથી કે તમે સ્થિરતા બનો.*

*દુનિયાનાં બંધનોથી જો હો છૂટવું ‘મરીઝ',*
*બસ આજથી તમે જ તમારા ખુદા બનો.*

*- મરીઝ*

Gujarati Shayri by મહેશ ઠાકર : 111822303

The best sellers write on Matrubharti, do you?

Start Writing Now