वृत्त- व्योमगंगा
लगावली- गालगागा गालगागा, गालगागा गालगागा
पापण्यांची ओल सांगे जीवनाची हार आता,
चांदणे मंदावलेले, भासतो अंधार आता।
खेळ दुनिया मांडते का भावनांचा, यातनेचा,
फोल झाली सांत्वनाही, वाटते व्यवहार आता।
जीवनाच्या सागराने, घेतले जे हेलकावे,
आज होडीला किनारा लांब वाटे फार आता।
घात नियतीने सदाही, का करावा आयुष्याचा,
वार सारे सोसुनी मन जाहले लाचार आता।
पाय घेता निसटता मज, अंत काही सापडेना
रिक्त झाली आज झोळी, व्यर्थ हा संसार आता।
अनु...🍁🍁
