ઓફિસ માં લંચ બ્રેક માં ડબ્બો ખોલતાં નિશ્રા એ મિસરી ને પૂછ્યું “ શું થઇ ગયું છે તને ? છેલ્લા પંદર દિવસ થી જોઉં છું કે તું ક્યાંક ખોવાયેલી જ રહે છે. આટલા વર્ષ ની નોકરી માં કોઈ દિવસ નહીં, ને છેલ્લા વીક માં બે વાર તને બોસ નો પણ ઠપકો મળ્યો. ઘરે કંઈ થયું છે ? “ .” હા યાર, નાની અમથી વાત માં મારા ને મોહિત વચ્ચે ઝગડો થઇ ગયો ને ૧૫ દિવસ થી અબોલા ચાલે છે .” નિશ્રા એ કહ્યું ,” શું યાર તું બી ! તને ગુસ્સો , દ્વેષ, રોષ, અકળામણ, દુ:ખ ને વેદના ના ભાવ મન માં ભરી રાખવા ના ગમે કે પછી પ્રેમ અને શાંતિ ગમે ? તારો ઈગો બાજુ માં મૂક ને આજે ઘરે જઈ ને ‘સોરી’ કહી ને વાત પતાવ. તારા નામ મુજબ મીઠી બન ને ! “
સાંજે મોહિત ઘરે આવ્યો, ત્યારે મિસરી એ ખચકાતાં કહ્યું , “ આઈ એમ સોરી, મોહિત ! આજે ... સાથે જમીએ ? “
ચાર આંખો અનરાધાર વરસી રહી, ગુસ્સા નું મીણ પીગળતું ગયું, પ્રેમ ની જ્યોત જલતી ગઈ ...
ઉપર આકાશ માં , રઢિયાળી રાતે શરદ પૂનમનો ચંદ્રમા પૂર્ણ રૂપે ખીલી ને શીતળ ચાંદની પ્રસરાવી રહ્યો હતો.
