#Kavyotsav
તારી છાયામાં
તને ક્યાંથી ખબર હોય
મેં બે જિંદગી જીવી લીધી છે
એક તારામાં અને એક મારામાં.
તારું પાસે હોવું એ તો સ્વપ્ન છે મારું
અને તારું દૂર હોવું સહી નથી શકાતું.
મને ખબર છે
તારી અંદર અને તારી બહાર જીવું છું હું તારામાં.
મને ખબર છે
હું છું તારા શબ્દોમાં, કવિતાઓમાં, તારા સ્વપ્નોમાં
સ્વપ્નાઓ હંમેશાં પોતાના હોય છે
મારા હોય કે તારા.
ક્યારેક થાય છે કે,
સૂરજમુખીનું હોવું કે ન હોવું સૂરજને શું ફર્ક પડે ?
કોઈ મુસાફર આવે કે ન આવે વિસામો લેવા
વૃક્ષને શું ફર્ક પડે ?
બસ
મને ખબર છે એટલી
મારું હોવું જરૂરી નથી તારા માટે
તારું હોવું સર્વસ્વ છે મારા માટે.
બસ
થોડીવાર તારી છાયામાં બેસી જાઉં ?
બહુ થાકી ગઈ છું
તને પ્રેમ કરી કરીને.
• ‘નવ્યાદર્શ’
