આજે હ્રદયનું
સફાઈ અભિયાન
આદર્યુ, ને પછી
કબાડી વાળાને
બતાવ્યું, આ જો;
અઢળક સામાન છે..
જૂની કટાઈ ગયેલી
આશાઓની ટંકળી,
પુરાણા અરમાનોની
ફાટી ગયેલી ડાયરી,
કંઈ કેટલાંય જૂનાં
અને ખખડધજ સપનાં,
ને પસ્તી થઈ ગયેલી
ઈચ્છાઓના પાનાં,
સૌથી ગમતીલી યાદોનો
મસમોટો પટારો,
કબાડી વાળાએ
મોઢું મચકોડીને
ત્રાડ પાડી,
કંઈ કિંમતી હોય
તો બતાવો;
મેં કહ્યું
હવે તો બસ,
ખંડેર થયેલાં
સંબંધોની થેલી
પડી છે,
પગ પછાડતા એણે
ચાલતી પકડી;
ને હું ફરી આ બધું
હ્રદયના એક
ખૂણામાં સમેટીને
પેલું ખોખલું તાળું
મારવા લાગી
એ જ આશામાં કે
પોપડા ઉખડી ગયેલી
દિવાલ પર લટકતી
ઈશ્વરની છબી
આ બધું અકબંધ
રાખશે ખરી..!!!😌🙏🏻
