તું તને ખુદને નડે એમાં શનિ, રાહુ કે મંગળ શું કરે?
જાત સાથે તું લડે એમાં શનિ, રાહુ કે મંગળ શું કરે?
એક જ્યોતિષે કહ્યું કે ઝાડનો સારો સમય છે, તે છતા,
પાંદડાં થોડા પડે એમાં શનિ, રાહુ કે મંગળ શું કરે?
આભ આપ્યું જા તને, પાંખોય આપી ને હવાનો સાથ પણ,
તે છતા તું ના ઉડે એમાં શનિ, રાહુ કે મંગળ શું કરે?
તું પડે તો કોઈ તારો હાથ ઝાલીને બચાવી ના શકે,
એટલો ઊંચે ચડે એમાં શનિ, રાહુ કે મંગળ શું કરે?
છે ખુશીની વાત, વર્ષો બાદ એણે યાદ આપી છે તને,
યાદમાં એની રડે એમાં શનિ, રાહુ કે મંગળ શું કરે?
-શૌનક જોષી
