ઊભા રો’. રંગરસિયા !
સોના ઈંઢોણી રૂપા બેડલું રે
નાગર, ઊભા રો’, રંગ રસિયા !
પાણીડાં ગઈ’તી તળાવ રે,
નાગર, ઊભા રો’, રંગ રસિયા !
કાંઠે તે કાન ઘોડાં ખેલવે રે –નાગર…
કાન મુને ઘડૂલો ચડાવ્ય રે –નાગર…
તારો ઘડો તે, ગોરી, તો ચડે રે–નાગર…
તું જો મારા ઘરડાની નાર રે –નાગર…
ફટ રે ગોઝારા ફટ પાપિયા રે–નાગર…
તું છો મારો માડી જાયો વીર રે–નાગર…
અરડી મરડીને ઘડો મેં ચડ્યો રે–નાગર…
તૂટી મારા કમખાની કસ રે –નાગર…
ભાઈ રે દરજીડા, વીરા, વીનવું રે–નાગર…
કસે તે ટાંક્ય ઘમર ઘૂઘરી રે –નાગર…
હૈયે તે લખ્ય ઝીણા મોર રે –નાગર…
જાતાં વાગે તે ઘમર ઘૂઘરી રે –નાગર…
વળતાં ઝીંગારે નીલા મોર રે –નાગર…
