(ગતાંક થી ક્રમશ...આસવ લખે છે)
મારા ફિલ્મ વિશેના વિચારો કહું તો હસતી ફિલ્મો જ મને ગમે....એવી ફિલ્મો જે આપણને ભુલાવી દે કે આપણે શું વિચારતાં હતા....આમ જોઇએ તો ફિલ્મો આપણી જીંદગી જેવા જ નથી??
બાળપણ થી શરૂ કરીએ તો બાળપણની યાદો આપણને સૌથી વધારે ગમે કારણકે ત્યારે ન તો હોય ભવિષ્યની ચિંતા કે જવાબદારી.... બસ ખાલી ને ખાલી માણવાની દરેક ઉગતી સવાર.. ધગતી બપોર અને મસ્તીની સાંજ......બાળપણ ગમતા ફિલ્મો જેવા છે જે વારંવાર જોવા ગમે... મારું માનજો એક વાર હસાવતી ફિલ્મ જોજો પછી કહેજો મને કેવી મજા આવે.....
અરે પણ મને હજી ક્યાં ખબર તમને કેવા ફિલ્મો ગમે? ખરું ને? જલ્દી જણાવજો... જાણવાની ઉત્સુકતા..
આનંદે આનંદિત આસવ.........
આસવ જી,
તમે તો બહુ સુંદર રીતે આપણા સફરની શરૂઆત કરી... હસાવતી ફિલ્મો વિશે વાંચીને જ મારા મોઢા પર હાસ્ય આવી ગયું....હવે તો જોવા જ પડશે મારે તમને હસાવતા ફિલ્મો.....
મારી વાતો ઉપરથી તમને થોડી તો ખબર પડી જ ગઈ હસે કે મને કેવા ફિલ્મો આનંદ આપતા હસે....
ફિલ્મોના અંત મને સુખી કે દુઃખી નથી કરી શકતા પણ ફિલ્મો વાસ્તવિકતા ની નજીક હોવા જોઈએ....જે ફિલ્મો સાથે હું તાદાત્મ્ય અનુભવું તે હ્રદયને સ્પર્શી જાય.... હવે તો મને ફિલ્મો પણ નથી ગમતા...મને ઘણીવાર એવું લાગે કે તે મને છેતરે છે...ઘણીવાર આપણે કલ્પના સાથે એટલા ઓતપ્રોત થઇ જઇએ કે વાસ્તવિક પાત્રો પાસે આપણી અપેક્ષાઓ વધી જાય.,.અને પછી....જવા દો એ વાત.....
ચાલો બહુ બોલી ગઈ એક નવો વિષય આવ્યો મારા વિચારોમાં....
બીક.... ડર....તમને બીક લાગે કોઈ દિવસ?
મારી વાત કરું તો મને ઘણીવાર વાતવરણ ની જ બીક લાગવા લાગે. ...હું ખૂબ ખુશ થઈ જાવ અને અચાનક મને એ વાતવરણ બદલાઈ જવાની બીક લાગે..... બાળપણ માં એવું જ થયું હતું એકવાર હું અને મમ્મી ખુબ જ હસ્યા હતા અને અચાનક અચાનક સવારે હું ઉઠી ને મમ્મી હસતી હસતી હમેશા માટે સુઈ ગઈ....બસ ત્યારથી ડર પેસી ગયો....
તમારા પત્ર મને ખૂબ જ આનંદ આપે છે.... અનહદ ખુશ થઈ જાવ છું....તેથી જ કોક દિવસ ડર લાગવા માંડે કે આ બધું ક્યાંક ચાલ્યું નહિ જાય ને?
💕 તારી વાતો ને તારા વિચારો,
આપે અનહદ આનંદ ને સાથે
લાગે મારી મીઠી નજર 💕
રાહ જોતી ઓજસ......
આનંદી ઓજશ જી,
એક મનોવૈજ્ઞાનિક સત્ય છે,કે જેવા વિચાર કરીએ તેવું વાતવરણ સર્જાય,અને જેવું નામ તેવું વ્યક્તિત્વ સર્જાય...આજથી હું તમારા નામની આગળ આનંદી લગાડી દઈ ને બોલાવીશ કઈ વાંધો નથી ને? અને. જ્યાં આનંદ હોય ત્યાં ડર તો ન જ હોય....ઝાકળ જેટલું જીવન આપણું ને પાછું તેમાં તમારે ડર સાથે મૈત્રી કરવી?
તેના કરતાં ડર ને જ ત્યાગી દયો ને ... તમારા પત્રો વાંચીને મને એવું લાગે જાણે તમે સામે ચાલીને વેદના અને દુઃખ ને પીડા ને એવું બધું નોતરો છો.....મારા મત પ્રમાણે ડર છેને બહુ અભિમાની મહેમાન છે આપણે બહુ ભાવભીનું આમંત્રણ આપીએ તો જ પધારે... તમને તો બહુ સરસ આવડે કોઇને આવકારતા કેમ સાચું ને? મજાક કરું છું ખોટું નહી લગાડતા....
ચાલો આ ડર ને દૂર કરવા તેના જ શત્રુ ને યાદ કરીએ.....
મારો વિષય છે...મિત્ર કે મૈત્રી....
હું ખૂબ આભારી કે ઈશ્વરે મને તમારા જેવી મિત્ર આપી...જે દિલ ખોલીને મને સાંભળે છે....
મારા મંતવ્ય મુજબ મિત્ર એટલે હ્રદયને લોહી પહોંચાડતી નસો....
આંખ બંધ થતાં દેખાતો ચહેરો...
રિસાવા માટેનું યોગ્ય પાત્ર...
મીઠી ઈર્ષા ના ભાવનો અનુભવ કરાવતો સ્પર્ધક....
સાચો મિત્ર હોય તો સાબિતી દેવી નથી પડતી અને મૈત્રી ખોવાઈ જવાનો ડર નથી લાગતો....હૃદય છલોછલ થઈ જાય બસ ખાલી એના પૂછવાથી કે કેમ છે તું?.....
ખરું ને? મને મિત્ર બનાવશો જેથી મારું જીવન છલોછલ થઈ જાય?
. આતુર મિત્ર આસવ
પરમ મિત્ર,આસવ જી.....
કેમ એવું લાગે જાણે હું તમને જનમોજનમ થી ઓળખું છું?
તમારી મૈત્રીની દુનિયામાં મને સ્થાન આપવા બદલ વધુ એક વખત તમને અહીંથી મૈત્રીનું વહાલ મોકલું છું.... નિખાલસ મૈત્રીનું....
મારા મતે મૈત્રી એટલે જે આપણને અલગ દુનિયામાં લઈ જાય....જેમકે તમે....તમારો આ પત્ર વાંચવાથી જ જાણે મારી આસપાસ મૈત્રીના ફૂલોમાંથી સુગંધ આવવા લાગી..
તમે નહિ માનો,હવે મને પણ ડર ને યાદ કરવાનું મન નથી થતું....કેમકે તમારી મૈત્રી જ આસપાસ છવાઇ ગઇ આસવ જી.. મને મારી આસપાસ ની સુન્દર વસ્તુઓને જોવાની દૃષ્ટિ આપી જે એક સાચો મિત્ર j આપી શકે... એ સુંદર વસ્તુઓમાં એક છે મને ગમતો મારો પોતીકો બગીચો જે મારો શોખ છે....આજથી આ તમારી મિત્ર પોતાના ડર ને આ મનગમતા બગીચામાં જ દાટી દેવાનું વચન આપે છે....
💕 મનગમતી
મૈત્રી તારી ને મારી
રણઝણશે💕
આ વાત ઉપરથી નવો વિષય આવ્યો મગજમાં
શોખ.....
(ક્રમશ)
