લાડકવાયી.....
પપ્પાના વહાલનો દરિયો બનીશ,
મા મને જીવતી જનમવા જો દઇશ.
તારા મીઠા ધાવણીયા થોડા ધાવીશ
અને ઝટપટ મોટી થઇ જઇશ.
ભઇલાના ભાગમાંથી કશું ના લઇશ,
એને વ્હાલકેરી બકીઓ ભરીશ.
મા મને જીવતી જનમવા જો દઇશ.
આંગણામાં સાથિયા ને મોર ચિતરીશ,
તારા ખોરડાનું અજવાળું થઇશ.
વહેલી પરોઢની નિંદર ત્યજીને,
તારા કામ કેરો સથવારો થઇશ
મા મને જીવતી જનમવા જો દઇશ.
.
ભણીગણીને હું તો હોંશિયાર થઇશ,
તારા ઘડપણની લાકડી થઇશ.
દહેજ કેરા દાનવથી ના તું ડરીશ,
હું સઘળાને પડકારો દઇશ.
મા મને જીવતી જનમવા જો દઇશ.
~~ વિષ્ણુ પંચાલ
