માથે ધોળા વાળ છે,
ઉંમર સીત્તેર માથે ચાર છે,
પેન્શન પણ જોરદાર છે,
અમ્મારે તો ભાઇ લીલ્લા લહેર રે....
ઘેર એક લાંબી ગાડી છે,
ઘર પાછળ નાનકડી વાડી છે,
એમાં તાજી દૂધી ઉગાડી છે,
અમ્મારે તો ભાઇ લીલ્લા લહેર રે....
અમ્મારો બાબો સેટ છે,
વહુ પણ બહુ ગ્રેટ છે,
બાબાનો બાબો સહેજ ફેટ છે,
અમ્મારે તો ભાઇ લીલ્લા લહેર રે....
બાબો અમારો એન.આર.આઇ,
આઇ.ટી મા એનુ નામ છે ભાઇ,
ડોલરમાં એની મોટી કમાઇ,
અમ્મારે તો ભાઇ લીલ્લા લહેર રે....
બાબો અહીં ખાસ આવે નહી,
બાબાને ઇન્ડીયામાં ફાવે નહી,
અમને કામ વગર બોલાવે નહી,
અમ્મારે તો ભાઇ લીલ્લા લહેર રે....
બાબાનો બાબો અંગ્રેજી બોલે,
અમને રેંજી પેંજી જેમ તોલે,
વાત સાંભળયા વગર તે દોડે,
અમ્મારે તો ભાઇ લીલ્લા લહેર રે....
ઘર મોટું બનાવ્યું એના માટે,
બે રુમ આખા એના ખાતે ,
વણ વપરાશે ચાદરો ફાટે,
અમ્મારે તો ભાઇ લીલ્લા લહેર રે....
એકલા એકલા જીવી જવાના,
કદી એકલા જ સાવ મરી જવાના,
બાબા માટે ઘણું છોડી જવાના,
અમ્મારે તો ભાઇ લીલ્લા લહેર રે....
ઘણું ઝાઝુ ભેગુ કરવું નહી,
લાગણીએ તરફડવું નહી,
કાલને માટે તૂટીને મરવું નહી,
અમ્મારે તો ભાઇ લીલ્લા લહેર રે....
—મેહુલ ભટ્ટ
