नवरात्रींचा उल्हास
झेंडूच्या गेंदांना ,दवाची साथ
आशीर्वाद देणारे ,आदिमायेचे हात!!
जागर आणि आनंद ,स्रीत्वाच्या शक्तीचा!
उत्साह पसरला, उत्सव दुर्गामातेचा!!
घटात बसली, माय भवानी उल्हासे
तपवूनी शरीरा ती ,दुरितांना हरवितसे!!
संबळाचा हुंकार!कवड्यांची माळ
भवानी देई, दुष्ट निर्दालना बळ!!
कन्येच्या पावली, कोमल निरागसता!
प्रसन्न होई शक्ती ,होऊनी ललिता!!
अष्टमीची रात्र ,गंभीर होतसे
उदाधुपांच्या घागरींनी, प्रांगण शोभतसे!!
अंबा महिषासुरासी, क्रोधाग्नीने जाळितसे!
सवे गणेश सरस्वती, कार्तिकेय शोभतसे!!
टिपर्यांच्या नादे ,घुमतसे आकाश!
घटाच्या छिद्रांतूनी, पसरवून प्रकाश!!
शस्रांचे पूजन,ज्ञानदीप सांभाळूया!
विचारांच्या मर्यादांना, उल्लूंघूनी जाऊया!!
अपूर्व सोहळा! पल्लवीत शेतीभाती
अंबेच्या आशीर्वादे, उजळो शरीर मन मती!!
आर्या.
