#kavyotsav
'તારી મારી દાંપત્ય નાવડી'
મારા સપના તારી આંખે સાચા પડતા જાય,
કંઈ ન બોલું હું તો પણ તને તરત સમજાય.
તારી મારી આ દામ્પત્ય નાવડી આમ જ સરકતી જાય.
ખુલ્લી સવાર જેમ,હોય રોજ નવી ને તાજી,
એમ જ જીવશું કાયમ ને,જીતશું જીવનની બાજી.
લાભ-શુભ ને ચોઘડિયા પણ અંદરથી શરમાય
તારી મારી આ દામ્પત્ય નાવડી આમ જ સરકતી જાય.
જાણું કે તું પકડી લઇશ જૂઠાણુ મારું, તોય અસત્યનો ઘૂમટો મેઁ તાણ્યો,
સમજીને પણ અણસમજમાં જ રહીશ, એ પ્રસંગ છે કયાં અજાણ્યો?
પકડાઈ જવા છતાં આબાદ છટકવાની મજા તને કેમ સમજાય,
તારી મારી આ દામ્પત્ય નાવડી આમ જ સરકતી જાય.
તારી મારી જોડી જામતી જાણે લાગે શબ્દાનુપ્રાસ,
કવિઓના માત્રામેળ પણ એની સામે લાગે ના કાંઇ ખાસ.
Made for Each other નો દાખલો આપણાથી જ સમજાય,
તારી મારી આ દામ્પત્ય નાવડી બસ આમ જ સરકતી જાય.
યાદ કરતાં એ મીઠી યાદો,વિતેલી વાતો, હૃદય મારૂં આ ચૂકે ધબકારો,
વીતે વર્ષો બસ આમ જ સાથે જાણે આંખનો પલકારો.
ટૂંકમાં તારી સાથે જીવન ઉત્સવ બની ઉજવાય,
તારી મારી આ દામ્પત્ય નાવડી બસ આમ જ સરકતી જાય.
કરતા મસ્તી-મજાક,ને થાય ક્યારેક મીઠી તકરાર,
એવું સુખ તો મને,સ્વર્ગ માંય ન મળે સરકાર,
લખતા 'નવ્યા નું નવલું નજરાણું', જીવન આમજ વહી જાય,
તારી મારી દામ્પત્ય નાવડી બસ આમજ સરકતી જાય.
-વાઘેલા શિલ્પા'નવ્યા'
